半夜三點，BB喊到好似警報器咁，全屋都醒咗。你衝過去，見到佢手腳紅晒、痕到不停「拗」，真係又攰又心痛。
香港天氣又濕又焗，加上BB皮膚特別嫩，濕疹呢頭先好返啲，轉頭又翻發。
想改善BB濕疹？唔一定要靠藥膏先得，用啱方法，揀啱天然有機嘅BB護膚產品，都可以慢慢改善濕疹情況，等BB舒服啲，全家都瞓得安樂啲。
香港嘅BB成日出疹，點樣分邊啲係濕疹，邊啲唔係呢？
香港天氣潮濕，夏天更加又熱又焗，BB皮膚成日「焗住」，好易出疹！
不過濕疹、熱痱、尿布疹睇落好多時差唔多，究竟可以點分？最近轉季，我嗱嗱臨做功課，整理咗個簡單嘅區分方法：
- 濕疹（Eczema）： 皮膚好乾、會甩皮、紅腫得好犀利，通常生喺面頰、手肘、膝蓋後面同頸位。BB會痕到唔停手咁拗，甚至拗到損晒流血。
- 熱痱（Prickly Heat）： 多數因為出汗多而引致嘅細細粒紅點，夏天特別常見，通常出現喺頸後、胳肋底、背部同胸口。
- 尿布疹（Diaper Rash）： 呢個就比較易分，主要出喺屁股同 pat pat 位置，多數因為尿片唔夠透氣或者換得唔夠密。
如果BB皮膚紅腫唔退，又唔停咁R，就算搽咗潤膚霜都冇好轉，就要記得盡快搵皮膚科醫生檢查，千祈唔好自己亂用藥膏。
「太乾淨」都會引發BB濕疹？
好多香港媽咪都以為「洗多啲」，乾淨就係啱！其實太乾淨反而會洗走BB皮膚嘅天然防禦力！近年醫學研究有新發現 [1]，疫情期間大家勤用消毒搓手液、勤洗手，過度清潔反而影響BB建立正常免疫系統，搞到免疫系統失調，令濕疹同過敏症發作率嚴重上升！
根據香港中文大學醫學院2025年嘅大型研究，疫情期間出生嘅BB，過敏症狀以濕疹為主，發病率比疫情前大幅增加咗46%！
所以話，「太乾淨」都未必係好，要幫BB保留皮膚上嘅「好菌」，維持皮膚微生態平衡，提升BB皮膚自身嘅防禦力，先可以有效減少濕疹反覆發作。
點做先可以「乾淨」又唔會「太乾淨」？
想幫BB清潔，但又唔想洗走佢皮膚本身嘅防禦力？咁天然有機產品就最啱使。呢類產品通常採用植物性界面活性劑（例如從椰子油提取），冇人造香料、冇防腐劑，清潔力足夠之餘又唔會過度刺激，能夠保持皮膚上面嘅益菌生態平衡，等BB皮膚嘅防禦力更加強！
成分入面好似燕麥、乳木果油、蘆薈呢啲天然嘢，除咗可以鎮靜痕癢、舒緩泛紅，仲能夠幫助皮膚建立更健康嘅保護屏障，減少外界致敏原入侵。
長遠嚟講，用天然有機產品嚟護理皮膚，就等如幫BB培養「自身防禦力」。同用強效清潔產品或者藥膏嚟短期止痕相比，呢個方法更能從根本去改善敏感體質。
點樣先可以揀到啱濕疹BB用嘅有機產品？
唔好以為寫住「天然」就等如有機㗎！有啲產品掛住「天然」個名，但成分表裡面依然有香精、防腐劑呢啲添加劑。所以揀產品嗰陣，記得睇清楚有冇國際認證標誌（例如ECOCERT、USDA Organic、EWG Verified）。成分方面，越簡單越好，首選冇添加化學香料或者酒精。正如話齋「天然就係溫柔」，尤其BB皮膚一旦出濕疹，用啱產品佢真係會舒服好多㗎。
想慳返啲時間同精力？其實 Serendipity House 已經幫你篩選好，佢哋嘅產品全部都有機認證，唔使再特登去超市逐隻產品慢慢睇。加上Serendipity House嘅產品口碑一向都好，唔使擔心會中招！
BB爆發濕疹，除咗用啱護理產品，仲有咩要注意？
一旦BB出濕疹，佢唔舒服，你又辛苦。想大家都舒服啲？呢幾方面就要留意：
1. 沖涼同保濕
BB出濕疹，好怕浸熱水。水溫過高會令皮膚更加乾燥同痕癢，所以將水溫維持喺32-37度會比較好。沖涼時間亦都唔好太長，最好控制喺10分鐘以內。沖完涼之後，可以趁皮膚仲係微濕嘅時候，立即幫BB搽返啲天然潤膚霜。咁樣可以更有效鎖住水分，減少痕癢。
2. 衣物選擇
最好揀純棉、透氣度高嘅衣服，等BB著得舒服之餘，又可以避免皮膚因為焗住出汗而不適。如果想更進一步，不妨考慮有機棉。呢啲布料未經過化學漂染，亦冇農藥殘留，對濕疹肌膚更加安全，能減低過敏風險。
3. 生活環境
室內空氣要保持流通，而濕度亦有講究，最好維持喺50-60%之間。開冷氣時，如果配合加濕器使用，會令BB感覺舒服啲，皮膚都無咁容易乾。
4. 日常飲食
假如BB仲係哺乳期，媽咪嘅飲食就要注意清淡，避免食辛辣或容易致敏嘅食品。
當BB開始進入固體食物階段，可以俾佢補充一啲益生菌食品，或者適量咁補充益生菌補充劑，嚟調節腸道菌群。緊記，引入固體食物要循序漸進，並且要留意BB有冇敏感反應。
近年有科研發現 [2]，BB嘅免疫系統同佢嘅腸道菌群健康息息相關。只要腸道菌群健康，免疫功能先至可以正常發揮，從而減低患上過敏性疾病嘅風險。
5. 心理支持
濕疹令BB唔舒服，搞到我哋做家長嘅心情都會受影響。加入一啲媽媽群組嚟交流，不時分享下心情同吸取實用經驗，真係好有用㗎！
濕疹唔係無得醫，媽媽要有信心！
濕疹真係令人頭痕，但記住，佢唔係絕症。
香港天氣幾難搞都好，只要搵到適合BB嘅護理方法，用啱溫和天然產品，BB嘅皮膚就會慢慢穩定落嚟，你都可以瞓得安樂啲。
媽咪，加油呀～ 你唔係一個人㗎，一齊幫BB重拾「滑溜嫩嫩」嘅皮膚啦！
參考資料 (References)
香港中文大學醫學院 (2025); 《中大研究指頻繁消毒或增濕疹及過敏性疾病風險》。
香港中文大學醫學院 (2024); 《中大醫學院證實其研發的口服微膠囊活菌配方SIM03有效改善兒童濕疹患者的病情及生活質素》。
香港醫院管理局; 《兒童健康攻略》。